කෙල්ලක බිරිඳක වෙන්නැයි
සාරිවලින් සැරසෙන්නැයි
උහු කීයෙහු
“ගෙත්තම්කාරියක වෙන්න
අහර පිසින්නියක වෙන්න
මෙහෙකරුවන් සමග නිතර
දබර කරන්නියක වෙන්න”
“අනේ සුදෝ වෙනස් වෙන්න”
වර්ග කරන්නෝ ඇවිදින් මොර දුන්නෝ
“තාප්ප මත ඔහේ වාඩි වෙන්න එපා
ජනේල තිර තුළින් එබී බලන්නෙපා”
“'ඇමී' වෙන්න – 'කමලා' වෙන්න
තව තව හොඳ වී 'මාධවිකුට්ටි' වෙන්න
කාලය හරි
නමක් භූමිකාවක් හෙම තෝර ගන්න”
“විකාර සෙල්ලම්වල නියැලෙන්න එපා
භින්නොන්මාදෙන් වාගේ ඉන්න එපා
කාමිනියක වෙන්න එපා
ආදරයක් බිඳුණු විටෙක
ලජ්ජා සහගත විදියට
සද්ද නගා අඬන්නෙපා.........”
.........මට මිනිසෙක් මුණ ගැසුණෙය
ඔහු හට ආදරය කළෙමි
ඇමතූ මුත් මා ඔහු ඒ
කිසියම් නාමෙකින් නොවෙයි
මා මෙන් ආදරය සොයන
ඕනෑම ගැහැණියක අවැසි
ඕනෑම මිනිසෙක් විය ඔහු !
ගඟක පිපාසිත ඉක්මන විය ඔහු තුළ
මුහුදක වෙහෙසින් තොර බව විය මා තුළ
සියළු දෙනම අමතා මම
ඔහු කවුරෙක්දැයි ඇසුවෙමි
“ඒ මම” පිළිතුරක් ලැබිණි
සියල් තන්හි සොයා බලා
මේ ලොව තුළ “මම” යනුවෙන්
තමා හඳුන්වා දුන් ඔබ දැක ගත්තෙමි
කොපුවක ලූ කඩුවක් මෙන්
සිරව එතී ඔබ සිටියෙහි.
නුහුරු නගර – හෝටල්වල
රෑ දොළහට තනිවම බොන
“මම” ඔබ විය
සිනා නගන “මම” ඔබ විය
ආලය කර ලජ්ජා වන “මම” ඔබ විය
මියෙමින් සිටියත් උගුරේ බිඳුණු හඬින්
එසේ නැතැයි මුසා කියන “මම” ඔබ විය
ඔව්! පව්කාරිය ද මාය
සාන්තුවරිය ද මෙමාය
ස්නේහවන්තිය ද එසේම
පාවා දෙන්නිය ද මාය
ඔබේ නොවන කිසි සතුටක් හිමි නැත මට
ඔබේ නොවන කිසි දුකකුත් හිමි නැත මට
මම ද සබඳ මා හට “මම” යැයි අමතමි......
-Copied
[ඉන්දියානු ජාතික Kamala Das කිවිඳිය (1934 - 2009) ගේ“ An Introduction” නමැති කවියේ පරිවර්තනය]
